Maio rematou celebrando as Letras Galegas
![20240531_144111](https://santiagoapostol.edu.ar/wp-content/uploads/2024/06/20240531_144111-770x433.jpg)
Rematou maio e, como non podía ser doutra forma, acabámolo celebrando as nosas letras.
O venres 31, o Departamento de Lingua Galega e Literatura organizou unha xornada na que o alumnado do 2.º ciclo de Primaria decidiu o que quería compartirlle aos compañeiros e compañeiras entre toda a diversidade de propostas que estiveron traballando nas aulas. Foi unha xornada diferente, na que nos sentimos en Galicia.
Houbo moitas cancións, contos… e tivemos tempo para recordar a Rosalía de Castro e a Luísa Villalta, grandes protagonistas das Letras Galegas. Mesmo nos chegaron novidades delas a través do “Xornal Galego” inventado polo alumnado de 5.º!.
Estivemos no camerino de María Casares e viaxamos ao Museo de Galegas Villalta-Asorey con contos, acrósticos, cadros e esculturas que nos achegaron a mulleres galegas universais. Asemade, lemos poemas e xogamos un pouco, que é o que máis nos gusta, grazas ao alumnado de 6.º B.
E aínda nos sobrou tempo para que os maiores nos compartisen as súas propias coplas dos maios!. Como nos cantou o grupo de 6.º A: Sempre EN GALEGO!